Il Vescovado Costiera Amalfitana

Pubblichiamo i versi di Enzo Del Pizzo, celebre poeta dialettale e cantore delle tradizioni della Costa d'Amalfi, che col suo inconfondibile humourm racconta il coronavirus dopo un anno da incubo.

di Enzo del Pizzo

E stammo chius''a rinto 'n'ata vòta

'A Zona Rossa ccà s'è mmis''e casa

Nuje 'o ssapimmo, nun ce stanno scuse,

'a colpa è 'a nosta, nun c'è niente 'a fa'!

È justo 'n'anno, embè, nun pazziammo,

ca ce' hanno ditto "Miett''a mascherina!"

Te faje 'o segno 'e croce d''a matina,

Tra naso e musso 'a vaje po' a piazzà'!

Ce vo' pacienza, e cchesto pure è ovèro,

t''a tiene 'nfaccia pure pe' mangiare

Guagliù, ccà ce sta poco 'a pazziare,

appis''a recchia, no, nun ce'adda sta!

L'anno passato, proprio 'e chesti tiempe,

pe' tutti, accumminciaje 'a clausura

"Restate calmi"! "Si, niente paura"!

"È ccosa 'e niente, tutto passarrà"!

Ll'avimmo visto chello ca è succieso!

Sultanto 'e primme juorne è ghiuta bbona:

'a parte grossa ha ffatto, embè, 'a pultrona

che a nnuje ce'ha vvisti, certo, scufenà'!

'Ncopp''a terrazza (embè, pe' chi 'a tène)

a ccielo apierto nuje ce simme state

E llà a squarciagola ammo cantate,

avènno ammirazione 'a ccà e 'a llà!

Ma mò, dicimmancello, 'o fatto è serio

e pure 'o ggrasso 'a cuollo ha perzo 'a vacca

Pe' ttutte passa 'o viento dint''a sacca,

e nun ce stanno 'e solde pè magnà'!

'A Caritas adda campà' cient'anne!

Mantène 'e pporte aperte ogni juorno

Appizza 'e rrecchie, po' se gira attuorno,

'nu muorzo 'e pane nun 'o fa mancà'!

Simm'arrivate a cchesto, mamma santa!

Famiglie sane, puvertà assoluta!

Senza lavoro, serenità sparuta,

e nun sapimmo si fenisce ccà!

Ammo perduto tutto, che tristezza!

Manco 'int''a chiesa, auniti, se po' stare

Distanziamento sempe da osservare

Luntan''a tutte quante s'adda sta'!

'E matrimonio, po', nun se ne parla

Ce vo''na sciorta pe' truvà' 'na casa

'E fa' famiglia, allora, nun è ccosa

S'invecchia 'o munno? E lascialo invecchià'!

Si po' te vutte, e faje 'a cerimonia,

vinte pariente ammessi sulamente

Chella jurnata resta bbona a mmente

Amici 'e vecchia data chi t''e ddà?!

Manco a chi mòre se po' accumpagnare

'E funerale? No, nun ne parlammo!

Chesti doveri, certo, c''e scurdammo

Sultanto 'a storia, po', 'e ppò cuntà'!

L'Italia tutta campa p''o turismo

'A tutt''o munno sempe vène gente

'Sti ccose, certo c''e ttenimm' a mmente

Aumenta juorne-juorne 'a puvertà!

Comme se fa, si nun se po' viaggiare?

L'economia è ghiuta a ccapasotto

Senza denare a ccarte quarantotto

vanno 'e speranze, e quanto ce sta 'a fa'!

'E scenziate fanno 'a parta lloro:

so' impegnate p''a vaccinazione

Ce garantisceno immunizzazione

e s'accummincia, forse, a raggiunà'!

Sultanto diece mise, punto e a capo:

ce vaccinammo tutti 'n'ata vòta

Ce'avimma stà, accussì gira 'a ròta,

sempe si 'a vulimma fa' girà!...

Ma 'e surprese stanno 'a rèta 'a porta:

'O Covid se modifica ogni juorno

Continua a ce levà' 'e ggente 'a tuorno,

rispetto nun ne tène, nè pietà!

Ce fa 'e spese 'a giuventù ca cresce,

ca certamente allèra vo' campare

Di sacrifici nun ne vò parlare

E dice: "Piglia 'a vita comme va"!

Nun c'è 'na scola ogni juorno aperta

'E ccriature 'e primm'elementare

s''anna scurdà' 'o maestro "basilare"

ca mette 'a penna 'mmano e dice: "VA"!

>Leggi anche:

«'Nu virus disgraziato!»: i versi in vernacolo di Enzo Del Pizzo